ЖЕНОБЛОҐИЯ

ЗАПИСКА

Ясмина ШВЕТ У ХТОРИМ ЖИЄМ

Нєт красшей рочней часци од яри. Вєдно зоз природу ше будзиме и ми, цале нашо єство. Коло нас шицко квитнє, а у нас ше будзи наша енерґия.

Того року то було ище интензивнєйше, пре тоту уж шицким познату корону. Праве кед пришла яр, розказане нам остац дома, у своїх обисцох. Хто мал щесца, могол шедзиц на дворе, лєбо препровадзовац час у загради.

И у нас бул таки шор. Шедзиш дома, з дому робиш, дзеци з дому уча. Правда, було днї кед биш дзечнє вискочел зоз своєй скори, бо нє лєгко буц у исти час мац, ґаздиня, наставнїца, роботнїца.

Алє, нїкому нє було лєгко. Та анї мнє. Док сом ше нє звикла же обидва телевизори завжати пре школу, кажди час даєдному дацо почина, лєбо треба дацо закончиц, научиц, дописац, преписац итд…

То бул идеални час за превипитованє. Гоч маш кеди, нє можеш патриц телевизор, шедзиц за компом, лєбо дац дачому другому же би вжало твою увагу. Остала сом сама зоз своїма думками и вшелїякима чувствами.

И добре же так. Потераз сом нє обачовала же ме так опущує нєобовязне длобанє до заградки и чесанє пса. Праве тота ситуация ми помогла же бим нашла свой мир у таких єдноставних стварох. Бо часто думаме же кед будземе мац нєзнамцо, та же будземе щешлївши, же вец будземе чувствовац мир у души.

И наисце бим нє мала цо инше повесц о тей корона ситуациї. Нє можем виприповедац нїч шмишне, нїч глїбокодумне, мудре, або инспируюце. Оддалєла сом ше од шицкого цо ме женє же бим сполнєла дачийо очекованя, од шицкого цо ше ми наруцує и цо сом самей себе наруцовала же мушим поробиц пре хто зна хтори причини. Нє, нє…

Треба уживац у єдноставних стварох. И нє постої лєпше чувство як кед ци ше рано дахто ошмихнє и пошепта: Добре рано!

Tags: , ,

Leave a Reply

Your email address will not be published. Required fields are marked *