ЖЕНОБЛОҐИЯ

ПИПА

Ясмина З ДРУГИМА У КОЛЄ

Шнури по цалим обисцу… Тельо маме тоти „гадзиска” же ше их нє мож ментовац. Вше сом задумовала же збавим даяки модерни ґеджет цо их позбера на громаду. Розпатрала сом по интернету и лєм цо сом нє наручела, кед мой, як прави майстор и ґазда у обисцу, гвари:
– Лєм пипнї шнури! Лєдво сом их понамесцал.
– Но, га нє видзиш кельо єст моху од праху у нїх? Дай, чловече, стварно… Шицки тоти шнури нам треба???
– Лєм сом чекал кеди ше опиташ. А кед сом ци гварел же нам нє треба интернет до каждей хижи и на обидва телевизори, та лєм цо ши трецу шветову войну нє зорвала. Знаш ти кельо сом пенєжи потрошел на шицки шнури?!
Скрацел ми язик. Енки. А так и було. Дзеци сцу мац интернет у своєй хижи, и на телефонох, и на компютеру и на телевизору, а я ше мушим за нїх завжац. Ту и кабловска, телефон, та анї нє чудо же єст тельо шнури.
Алє, як то звичайно дябол придзе по свойо кед ше найменєй наздаваш, а то було праве док тирвало Шветове першенство у фодбалу, кабловска почала трокирац. Нєдзеля пополадню. Даєдни програми мож патриц, а даєдни нє. Вшелїяк, тоти цо преношели фодбал. Було мурчаня, дудраня, рестартованя рисивера, и на концу – ГЛАСНИ протест при дежурней служби кабловского оператера.
Же бим дакус ублагала ствар, док зме чекали майстрох, як мац, свидома же жиє зоз трома фодбалскима фанатиками, оптимистично гварим:
– Добре, хлапци, ви знаце же нєшка Новак бави финале Вимблдона? Будземе патриц?
Попатрели на мнє, а я раз-два далїнски и – ришена ситуация.
Патра, вони, патра, та ше од шицкого тенису мой пита потим як зумирали кральовску ложу:
– То Пипа?
– Та дзе, знаже же нє Пипа! Ти нє знаш як вона випатра?
– Га, знам. Думал сом же то вона.
– Нє, нє, нє… Пипа тей ту шестра. Тота цо шедзи то войводкиня од Кембриджа. И мено єй Кейт.
– Ага – прежубротал.
Шорує ше сервис, добри бекхенд, одлични форхенд, а вец поен на мрежи. Новак вше лєпше бавел, а анї нє знал же ше його добре бависко и у нас одражело на вше лєпшу атмосферу. Оператерка обецала же технїчна служба руша, пауза медзи двома фодбалскима змаганями ище тирва, а Новак вишалює процивнїка. Кед, ознова кадер на кральовскей ложи.
– Тота Пипа?
– О, цо ши ше так заквачел за Пипу? Нє, анї то нє Пипа! То войводкиня од Сасекса. Нова войводкиня. Меґан Маркл.
– Кельо же их єст?
– Ша, кельо! Кельо же єст принцох у британскей кральовскей фамелиї?
Цихосц. Я упарта:
– Кельо же принцеза Дияна мала синох? Га? Но, та кельо мала синох, тельо ма и нєвести. Кед ше одаю за принцох, вец су войводкинї уж хтора од кого… Чекай, знаш ти вообще хто була принцеза Дияна?
– Знам. То тота цо була принцеза, а вец ю нє сцели чи цо, а вец анї вона нє сцела, та… А якей ма вязи Дияна зоз Пипу?
Слухам, и нє можем вериц! Як нє зна, ша, вона єй сваха! Щесце же пришли майстрове за кабловску…
Майстром сом отворела по пиво и уварела кафу. Най поробя як швет, най ознова мож патриц фодбал у нашим обисцу. Лєм най ше ми нїхто вецей нє пита хто Пипа!■☺

Tags: , ,

Leave a Reply

Your email address will not be published. Required fields are marked *