ANIMAL PLANET
Кедишик сом ше барз задумала кадзи тот швет идзе… Наисце! Гранїци ше премесцаю барз швидко. Тото цо дакеди було нормалне, тераз постало нєкаждодньове, а тото цо дакеди було нєнормалне, лєбо нєзвичайне, тераз ше подрозумює. Начудака!
Знам же векшина людзох барз люби животинї. Кажде з нас позна голєм єдну особу хтора любов ґу тим єством указує баржей як ближнїм. Випатра же людзе и животинї, агейце, походза од истого, або су голєм барз слични (кед ше уж так добре розумя). Мушели ше зожиц єдни з другима, та так настала вяза хтору нє мож претаргнуц. Алє, руку на шерцо, нє шицки любя животинї. Ниа, я наприклад. Но, нє же их вообще нє любим… Я лєм нє любим же би ми папаґай лєцел над танєром, анї же би ми пес брехал у хижи. А швиня? Фуй! (Поздрав Джорджови Клунийови). Зна ше кому дзе место.
Уж чуєм як себе дзепоєдни жубротаю до бради: Тота кед нє люби животинї, нє люби анї людзох! Ццццц…
Е – ту сом вас чекала! Т о н є п р а в д а! То така цивилизацийна спреводзка же аж! А так сом ше стресла як и тото кед зме були дзеци, та зме гуторели док зме ше бавели на дражки: Хто станє на смужку, нє люби Тита! Ниє неґо!
Най ше розумиме – я любим лєм даєдни животинї, и лєм даєдних людзох. Най ми дахто пове прецо бим, наприклад, требала любиц чивуваву? Лєбо койота? Лєбо гевтого бачика з Капущаного цо кажде рано ноши млєко до млєчарнї? Цо го мам любиц. Ша, ту є, еґзи(с)тує… Мнє анї з кишенки, анї до кишенки…
Дзешка сом озда и пречитала же треба дзеци одмалючка научиц най любя животинї. Можебуц то правда, а мойо родичи нє погришели у тим нїч. Тото мойо одношенє ґу животиньом нє ма вязи зо мну. Бо зме мали и канаринца, и Бобия, и Бойса, и Джеки, а и я у обисцу мам Асю. И то таку мудру, и таку красну. Бернску суку. Мам и аквариюм з рибками. Алє, то шицко… Ту моя гранїца. Любим лєм Асю и пейц рибки. И нє вельо вецей людзох. И то цалком досц.
Но, най ше нє увредза тоти хтори свойо пудлочки облєкаю до красних, рижнофарбових бундичкох и купую им розкошни заглавки на хторих шпя, и други дранґулиї. Животинї то нє знаю ценїц! Кед сом Асї купела штучну косц у хторей єст вельо калциюму же би оштрела зуби, вона ю закопала до жеми як и кажду другу косц!
З другого боку, фауна на тей нашей прекрасней планети наисце фасцинантна, а чловек тельо того знїщел… Нє, наисце нє знам прецо длобем до того.
Пес чловекова найлєпша пайташка? Гм… Моя найлєпша пайташка, прешвечена сом, нє бреше и нє куса, и нє бива у хижки на дворе, алє єй приятельство ми нє може заменїц анї єдно шерсцате створенє…