ЕМОТИВНИ ПЛАН ЗА СТАРОСЦ
Прешол ище єден Дзень залюбених. Попри шицких шветох ище и тото. У шоре, треба славиц любов. Складам ше. Кед уж о нєй написани телї стихи, романи, вишпивани шпиванки, зняти филми и хто зна яки ище перформанси… Най нє звучим погришно – нє мам нїч процив нєй, алє покус ми цесно кед роздумуєм о тим. Исто як и о 8. марцу, Новим року, шицких шветох… Цошка ми ту дирґа.
Пришли якиш иншаки часи, шицко нам ше швидко случує, час лєци и ноши нови и нєпознати ствари и поняца. То ше одноши и на медзилюдски одношеня, та и гевти емотивни. Видзи ше ми же то скорей було иншак (цо би мало значиц и лєпше?). У шоре, кажде у живоце ма свою Лоту чи Вертера, алє скорей ше знало цо то романтика, цо то стримованє, наївне задзеранє, джмурканє и ганьблїви попатрунки… Таки способ виражованя любови тераз уж мож видзиц лєм у старих филмох. Руку на шерцо – кед би даєден лєґинь облєкол фрак, цилиндер и написал вам любовне писмо – шицки би го вишмейовали, нє так? Та зоз чим и на яки способ сцеме освоїц любов свойого живота?
Одвит мож поглєдац кед патриме яки дзивки думаю же би требали буц и як ше леґинє справую жадаюци освоїц любену дзивку. Нє знам же чи ше баш каждей дзивки так барз пача бицепси, трицепси и квадрицепси. Гоч ше велї пумпаю, пию креатини и вей протеїни, часто то нє досц. Помага и авто, облєчиво и мудри телефон. Алє кед ше озве а нє ма богати вокабулар и одлични смисел за гумор – пада нєодлуга (?). А мужове би требали буц чаривняки и у пораєню обисца, а нє лєм на словох. За собу би шицки шором мали одкладац ботоши и знац же уцицованє и варенє уж роками нє лєм женска робота. Значи муши знац хтора присмачка зоз хторим месом ше склада, и хторе єдзенє ма найменєй калориї (уж кед сце вариц…). Нїч то нє лєпше анї кед приду дзеци, бо то и його дзецко та муши вноци ставац, преблєкац, меняц пелюхи, научиц як ше виварює фляшки и ище ше прешпацирац у кочику же би ше ми, мацери, могли одпочинуц… Тото замишательство требал Айнштайн препущиц през свою теорию релативитета, та би нам шицким помогнул…
А о тим цо жени шицко сцу зробиц же би ше пачели гевтим горе, аж о тим треба писац. Складам ше же ше хлопи и жени озда и розликую же би мeдзисобно могли єдноставнєйше комуниковац, алє – гало! Дзе гранїца у тим шалєнстве? Паметам тоти нєполни два годзини кед сом першираз пошла на маникир. Людзе, то пече! Теди сом подумала же сом шалєна, церпиц таке печаце у релни за нохци, а и далєй будзем мушиц помивац, пресцерац и рибац купатило! А маникир нїч наспрам рижних зацагованьох, антицелулит третманох зоз рижнороднима квашнїнами (хтори вшелїяк полни зоз витаминами, минералами и фитосубстанцами…).
Нє гварим же ше треба запущиц. Крашнє видзиц жену хтора трима до себе (нашо мацери гваря же нїч без фризури и ципелох), а крашнє видзиц и хлопа хтори трима до себе. Поведло би ше же треба буц одмерани. Та вецка будземе знац буц одмерани и у наших потребох, будземе знац яки зме, цо маме. Яке идзе – таке стретнє, нє?
Та цо вец з Дньом залюбених и подобних шветох? Предкладам емотивни план за старосц. То значи же треба нєпреривно будовац вязи. Насампредз приятельски (бо ше приятельох здобува, а нє додава ;)… Почац ище у дзецинстве и нїґда нє преставац, треба вибудовац добре одношенє з родичами, у школи, на роботи, вшадзи дзе зме… Вецка маме право и обовязку направиц емотивни план за старосц од хторей ше нє будземе бац, алє у хторей будземе уживац зоз своїма… Без огляду хторе ше швето слави…