ЖЕНОБЛОҐИЯ

НАША МИЛКА МА НАЙЛЄПШЕ МЛЄКО

Ясмина ШВЕТ У ХТОРИМ ЖИЄМ

Знала сом же цали дзень мам беганя – рано порихтац дзеци до оводи и школи, одвесц их, пойсц на роботу, после того найсц даяки дарунок єдному дзецку за родзени дзень. А то нє лєм купиц (пове кажда мац). Купела бим такой, лєм кед бим знала цо. Нє сцем же би бул драги, а нє сцем ше анї ганьбиц. До пшамаца… Уж ми досц того… А дзень лєм починал…

На драги на роботу, стретам єдну другу мацер, та так бешедуєме, ґаду-ґаду. Вшелїяк, кажда з нас на дискретни способ дава гевтей другей до знаня же єй дзецко лєпше, совиснєйше, „опаснєйше”, интелиґентнєйше и ище койцо. Та, приповеда тота иста мац, яке єй дзивче було интересантне кед кедиш гварело своєй баби же най купує Имлеково млєко, бо єй мама там роби, та кед нїхто нє будзе куповац таке млєко, анї мама нє будзе доставац плацу. Удян гет! А я ше єй такой опитала чи вони плаца предплату за телевизию, на цо вона гварела же гат маю дас двацец езри длуства. „Но, вец и мой супруг нє будзе доставац плацу кед нїхто нє будзе плациц предплату”, (цоже, станула ми на пенал)… Вец зме прешли на другу тему…

Наисце сом ше з ню нє сцела прегвариц, алє випатра же ту єст цошка. Єдни продукую, други троша, а гевти знова дзешка индзей унапрямую пенєжи. То аж и мнє, як лаїкови у економиї, ясне… Алє як би було кед бизме куповали лєм од познатих? Наприклад кед бизме куповали вайца од сушеди, желєняву од родзини, кед бизме ходзели вше до свахи фризерки и куповали месо од свата месара… То ми у шоре. Нє процив того сом, бо добре тебе, добре и мнє. Кажде люби сталну муштерию. Аж и вельки маркети нєдавно уведли карточки за вирних купцох… То тото же кед ци дачийо услуги одвитую, та предлужиш зоз нїм сотрудзовац. (Того ше здогадли аж и политичаре кед сцу нашо сиґурни гласи пред виберанками).

Алє цо зоз другима, тирвацима вредносцами? З тима цо су на поверхносци нє такой таки видлїви? Чи ше нє треба и вец тарґовищно справовац – наприклад постац предплатнїк виданьох по руски, або плациц ртв предплату… 😉 У єдним анґлийским городским фодбалским клубу накадзи ше дзецко народзи, члени фамелиї го такой уписую як їх навияча.

Мнє ше видзи же мало хто од Руснацох ма свидомосц о тим же на таки, взаємни способ сотрудзованя, можебуц зачуваме єдни других, можебуц же нє препаднєме. Алє як и дзе у Новим Садзе позберац Руснацох и пробовац подзвигнуц свидомосц – най роздумую компетентни, а я тераз наисце мушим скоком запаковац дарунок, бо родзени дзень лєм цо нє почал…

Tags: ,

Leave a Reply

Your email address will not be published. Required fields are marked *