ПРОКРАСТИНАЦИЯ (ТРЕЦИ ДЗЕНЬ)
Верим же то и другим хвиля за свашта виновата – за болячки рижних файтох, од глави по костки, за нєрозположенє, за лєнївосц – и добре же ше маме на цо вицагнуц. У ствари барз добре кед маш на кого здилїц вину, а ище лєпше кед то хвиля. Вона ци нє подкопе мурик у загради як нагнївани сушед, а анї це нє будзе лац. Совершено.
Єст ту лєм єден мали ґужлїк, бо док ше ми так нєпреривно вицагуєме и глєдаме оправданє у койчим, заш лєм себе мушиме кажде рано у жвератку попатриц до оч (нє як гевта зоз тв екрана цо себе вше гутори: Добре рано, красавицо). Чловек раз придзе до того же ше конєчно спущи на жем, спозна самого себе, прилапи свою природу и характер и помири ше зоз самим собу. Гей, то тота найчежша борба у хторей нєт вигварки. Ту нєт на кого здрилїц, аж анї на хвилю. Бриґа лєм тота же якошик вше одрилюєме свойо обовязки, зочованє зоз самима собу. Чи кед сцеме схуднуц, чи кед сцеме престац куриц, чи кед сцеме почац вежбац… Я якошик думам же то ридко хто може себе розказац и поставиц очекованя хтори може без одрильованя сполнїц. И ище остац и тварди и дисциплиновани у тим. Я, наприклад, пукам уж на трецим крочаю. Кед сом сцела престац куриц, мала сом до совершенства аналитично обдуману стратеґию лєм нїяк же бим ю почала запровадзовац. Вше од пондзелку, та од пондзелку… До пшамаца… Но, єдного дня сом наисце и ришела. Перши два днї ишло добре, бо сом мала циль пред очми, алє треци дзень – колапс. Бриґа найвекша на швеце! Так ше ми курело, так ми пахло и нормално же сом нє витримала. Исте и зоз диєту: два днї добре – треци криза! Вєшенї сом, наприклад, сцела положиц бишалми до дунца. И мойого сом обробела же би ми их порезал. Лєм, кед сом пошла напияц, а вони уж прешли (ганьба будзе кед припознам же сом так прешла и з брескинями…).
И вец сом чула за славну прокрастинацию. Ниа у чим ту штос: ми нєпреривно одкладаме сполньованє обовязкох. Даєдни прето же ше боя зочиц зоз проблемом, даєдни прето же ше боя од нєуспиху, а даєдни прето же нє знаю як би жили без того. Точно потолковани и фази през хтори ше муши прейсц же бизме дошли до циля. Понеже сом знала же ми у шицким треци дзень критични, шицки сили сом унапрямела же бим тот дзень предриляла. Вец ми було лєгчейше.
Но, нє гварим лєгко, алє лєгчейше. У ствари то наисце барз чежко. Шицки зме людзе на хторих вплївую рижни фактори, околносци, а наша дзека часто нєдостаточна же бизме ше до дачого влапели. Алє, нє лєгчейше нам кед знаме през цо маме прейсц? Мнє гей, а дакому можебуц и нє…
Тераз наисце нєт цо класц до дунца, уж дзешец роки нє курим. диєту сом почала и удало ше ми прежиц треци дзень. Тераз ме корци лєм єдно: чи ше тот треци дзень нє уцагнє до даєдного другого дня на хторим ше наївно зошлїшнєм…