ЖЕНОБЛОҐИЯ

А ШЕРЦО У ПЕТОХ

Ясмина З ДРУГИМА У КОЛЄ

Нїґда сом нє любела горор филми, страшни и напарти сцени. Нєприємно ми кед ше зривам, одразу злєкнєм або дожиєм шок. Нє помага анї моцна музика хтора нагадує страхоти божи. Можебуц так реаґуєм пре мой нїжни сензибилитет.

Єден час сом ше наисце сцела зоз тим зочиц, та зме дома почали знїмац з интернету (упс, озда нїхто нє чул…) горор филми, алє гевти креволочни, психо, но, найгорши. Така сом була надумана вибориц ше зоз собу же сом нє сцела попущиц нїяким концом. Заверала сом уха, очи, сцискала зоз песцами и скривала ше под покровец… Нє помогло… Од теди знятих пейц предлуженьох филма, одпатрели зме два. Лєдво. Думам же у медзичаше обявени ище дас три-штири часци (хто люби най патри филм Saw кед шме). И наисце, яки то хори мозоґ може таке здумац? Та, хто вец ту нєнормални – тот цо здумує таке, чи я сеґинь, цо нє можем патриц? А-а… Я цалком як треба!

Но, кед би ше шицко затримало лєм на малих екранох… Тот мой, ище лєм кед сконтал же з яку куриплахку жиє, здумовал рижни способи як ме настраши, а вец ше зацинал од шмиху пре мою реакцию. Вноци виходзел зоз цмей хижи, випущовал рижни звуки, подкладал ми под дзвери метли, складал понад дзвери заглавчки и хто зна цо ище… Раз ме так настрашел же сом, верабоже, уж рушела ґу шветлу на концу тунела… Маґарец. Праве прето сом лєдво чекала же би дзеци дакус подросли. Модлїм шицки мацери цо ше з тим нєскладаю най затримаю свойо думанє за себе и тот пасус нє читаю до конца. Кед же думаю же сом нїяка мац, то наисце лєм їх проблем. Но, та, цо? Най их оцец дакус урнише, мнє уж поверх глави, а дзеци най ше челїча. Озда думаю же то у живоце лєм мотильчки и писньочки? Нє, нє, нє… Опасносц на каждим углє. Лєпше най то науча дома…

Тераз, кед дзеци векши, маю вецей розума, та видза же мами од страху очи як цибулї. Позберали оцово штоси, та ме и вони страша. Дакеди то таке дзецинске, а дакеди ми, боме, шерцо у петох. Дармо крашнє толкуєм, дакеди и злярмам, алє ше випатра будзем мушиц заозбилїц. Док ище нє надумали знїмац мойо реакциї и класц на ю-тюб. Тоти нєшкайши дзеци на шицко порихтани…

Tags: , ,

Leave a Reply

Your email address will not be published. Required fields are marked *