БИБЕР ЧИ БАЙБЕР?
Барз бим любела мац ултразвук. Ви нє? Яке то ма буц кул… Задумайце – витхнєце ногу, так, одразу, на ровним и нога спухнє. Спухнє да це бог сачува… И вец мушиш бежац на урґентне, сликовац, а так – уключиш ултразвук до струї, помасциш зоз тим маскадлом и опатриш цо ше стало. И поставиш себе дияґнозу – чи треба прикладац палєнку, чи мушиш заш лєм до др.
Тота нова технолоґия супер, нє так? Шицко ци на изволте. Нє мушиш чекац у шоре кед сцеш плациц рахунки, нє мушиш ношиц пенєжи зоз собу. Досц ци лєм карточка. Уключиш монитор и обиходзиш Лувр, шветово музеї и престолнїци, а можеш аж и коцурску церкву (гоч, контам, можебуц у будучносци найсиґурнєйша вариянта будзе з дому… гм…).
Можем задумац як дакеди було: лампаши, огнїска, єдна шерпенка, рондї койдзеяки, воли, плуги, пранїки… Та, так було. Людзе анї нє знали за лєпше. И то и добре так. Бо кед знаш же постої дацо екстра, дацо претерано урбане, дацо фенсерашке, флипнєш док тото нє достанєш. Вец шицки тото на це обачую, маш вельо риквести, нових френдох, и здумуєш нови хаштаґи и баш ци опуштенция…
Паметам добре, дзешка сом пречитала як єден пробовал здобуц нових приятельох, алє так як ше то роби на Фейсбуку. Та застановйовал людзох по драже и указовал им слики своїх домашнїх любимцох, членох фамелиї, зоз рижних преславох и путованьох. Приповедал им о тим цо єдол, зоз ким бул, и гуторел им же му ше пача. После того пробованя Фейсбук-живота достал три особи хтори го провадзели: двоме полицає и єден психиятер. 🙂
И нє прейдзе вельо, а ми шицки будземе жиц у таким швеце. Виртуалним. Бо уж вецей нє мушиме нїкому пойсц на родзени дзень. То лєм трошок. И так ше лєм патри хто кельо ма лайки лєбо сабскрайби. А то лєм початок. Нєодлуга буду класц до нас даяки чипи, будземе цали вискенирани и нашо цела, наша особносц постанє власнїцтво даяких Вельких братох. Постанєме власни голоґрами, та зме у исти час годни буц и ґаздинї и фаховки (мож то так повесц?), и будземе на пияцу и на важней схадзки. Так ше ми видзи. Нє значи же мам право, бо з власного искуства знам же то нє випаднє вше так як ше нам видзи и яку маме визию.
Любела бим кед би шицко ишло вельо помалши. Кед би ше технолоґия помалши розвивала, кед би нам дзеци длужей остали мали, кед би ми цо длужей оставали млади. Чекай: нє видумал дахто машину цо застановює час? Га, ґарант. Лєм то нє шму явно повесц. Но, розодкриєм я банду. Идзем тераз отвориц полемику на Твитеру. Цо думаце, будзе добри хаштаґ: #сцеме вично остац млади?