ЖЕНОБЛОҐИЯ

ГУЖВА ОПРЕЗ ҐОЛУ

Ясмина З ДРУГИМА У КОЛЄ

Почало длуго очековане Европске першенство у фодбалу. Купени слунечнїк и пуканки (по килу), а ту, боме, и картон пива. Най ше найдзе. Ша, ми озда, жиєме за фодбал! Оле, оле…

На початку була барз напарта атмосфера. Ґуґлало ше хто з ким у ґрупи, хто кеди бави, хто судийове, а боме и хтори милионски плацени фодбалере нє заслужели место у своєй репрезентациї. Слухала сом днями о тим. На концу и я гварела же – нач бавени квалификациї кед и так скоро шицки европски держави на першенству? (окрем нашей). Требали, брату, шицки бавиц, та хто покля сцигнє. Но, мой на мнє штрелєл з очми: Озда ми лєпше знаме… Ей, чи тебе дакеди зацерпнє язик, дудрал себе под нос.

Розумце, я нє хпам нос до шицкого, наисце, алє кельо ше лєм нашедзим на трибинох док дзеци на тренинґу и на змаганьох… Ша дакеди у тижню випаднє же кажди дзень водзим єдного тадзи, другого тамадз… Мам и я свойо думанє. А ґу тому, хто им, модлїм крашнє, райбе дреси, шорци, штуцни, рибе рукавици и видлобує блато з копачкох? Га? Кед би вони знали яки други мацери… Приду напирлитани на трибини, а тото цо з устох виходзи – ю, ю, ю… Анї оцове нє иншаки. Доруцую дзецом, грожа, лаю, а кед судия жена – аж теди настава права представа. А я там барз добра и културна…

Єден час сом оставала дома увариц полудзенок, док их мой водзел на змаганя. Досц то длуго тирвало, а вец ше дзеци питали чом их и я нє ходзим патриц, кед други приходза… Та сом пошла. Ша, волїм шедзиц там як коло шпоргета бегац. И так ше ридко случи кеди єме вєдно нєдзельови полудзенок.

Шицко то у шоре, нє поносуєм ше, то тестостерон, ша нє балетанє су, алє раз, и тото мушим написац, було барз горуцо кед сом пришла з роботи… Була сом сама дома, и кед сом ше очутела од пекоти, влапела сом саму себе як шедзим у фотелї, пиєм пиво и патрим – фодбал…

Дзеци дакеди гваря же сом барз строга, бо сом им забранєла бавиц фодбал у дворе. Га, кед копаю до тей лабди як дураци! Уж поламали квеце, одбили циву за дижджовку на ґаражи, а нє раз лабда лєцела и до сушедового двора. Гварела сом им же их упишем на фолклор та мир. А ґу тому, вони нє фодбалере, алє ґолманє. А вони мнє на мудро: Алє, мамо, ти найлєпши ґолман! Шицко нам бранїш!

 

Tags: ,

Leave a Reply

Your email address will not be published.