ЖЕНОБЛОҐИЯ

НАЙДЗЕМ СЕБЕ МЕСТО!

Ясмина З ДРУГИМА У КОЛЄ

Добре паметам часи кед ми мой, ище як леґинь, гварел: Идземе! Шедла сом до авта, на преднє шедзиско, з авта ше скурело, и ми – на драгу! Лєто, цепле пред вечаром, заход слунка красни гоч на хтори бок попатриш… Романтична музика грає, виложела сом ноги на гевту пластику дзе контролна табла и думам себе: Як уживам, яки тот живот красни… Шедзим ту, на предку, шицко видзим опрез себе и за собу, яка милина… Муши буц же тот дзень ошвитнул лєм прето же би я тераз уживала.

О даскельо роки обставини ше досц пременєли, як и мойо облюбене место у авту. Побрали зме ше, о два-три роки пришло перше дзецко. Я, як и кажда мац з малим дзецком, шедзела на задку. Беба у шедзиску, а я коло нєй. Правда, пробовала сом шедзиц на предку, алє указало ше же то просто нєможлїве, нє мож було на мире дойсц  там дзе треба. Раз синчок финка, уж кихнє, а „клайбаси” по браду… Нїч од мойого розкошу! Уживац будзем познєйше…

Познєйше пришло друге дзецко, и то таке хторе ше и дзень-нєшка нє люби вожиц. Та нє лєм же сом ше тераз з двоїма дзецми гужвала у „буджаку”, ище сом пана мушела и забавяц. Кельо раз тото дзецко поставело питанє: За кельо минути сцигнєме? або – уж зме сцигли?, нє мож анї почитац. И я сама закуковала дзе зме.

Вшелїяк же сом знала же тоти часи док дзеци мали, и док уж обидвоме годни шедзиц у своїх шедовискох, напевно приду. И теди сом годна буц на своїм месце. Свою сатисфакцию сом находзела у хвилькох кед сом сама даґдзе гонєла. То таке ошлєбодзуюце чувство…

Пред даскельома мешацами, кед зме ше вибрали на длугшу драгу, на заднїм шедовиску настала война – обидвоме би лєгнуц, бо гат, треба дас два годзини путовац, а кажди би дримац. Думам себе – треба нам камп-приколицу, а нє авто! Чи вони думаю же су у готелу, чи цо? Нормално, мой им гварел бааарз мудро же ше дому враца пешо кед так предлужа… Вони ше анї нє стресли. То було остатнїраз кед сом ше вожела на предку.

Нєодлуга старши син наполнєл дванац роки, и зоз озбильним виразом твари ми сообщел же од нєшка вон шедзи у авту на предку. Я най идзем на задок.

Вец сом подумала же то и младши нєодлуга будзе сцец свойо права… Випатра же себе будзем мушиц купиц моторочку…☺

Tags: , ,

Leave a Reply

Your email address will not be published.