ЖЕНОБЛОҐИЯ

ЗАД(ОК)

Ясмина ШВЕТ У ХТОРИМ ЖИЄМ

Барз любим реклами. Алє тоти добри. Тоти хтори маю ясну и добре пренєшену слику того цо рекламую. Могла бим о тим писац барз вельо, бо кед сом була младша та сом ше заношела же постанєм тота тета цо здумує реклами. И вельо сом о тим роздумовала.

Людзе, верице лєбо нє, у нєшкайши час шицко у реклами. Нє бешедуєм лєм о продуктох хтори ше рекламує – безпрекорно густи власи хтори вше як новонароснути, без спуканих концох; били билючки зуби без парадентози; ноги пахняци без рижних печарочкох медзи пальцами; худе цело, омеґи 3-6-9, сто чуда… Ша и сама сом нє раз купела дацо цо рекламую, бо сом подумала же за мали пенєж (?) ришим тельо того… Паметам кед скорей ходзели койдзеяки тарґовци по обисцох, та предавали рижни апаратури – за бритвенє чи штриганє, а кед их купиш та достанєш специялну кнїжку, а кед купиш ище дацо, вец достанєш задармо нпр. метолку. Памета дахто? Любела бим знац келїх так оштригали…

И нєшка то так – волаю людзох на безплатни вечери на хторих промовую свойо продукти, а ти ше вец ганьбиш нїч нє купиц, та… До задку…

Мушела бим спомнуц и саморекламованє. Того єст на каждим крочаю. Самореклама дакеди зна чуда справиц. Ша и сами познаце дакого хто вично здути и бесни. Нє опитали бисце ше му анї кельо годзин, а нє дацо инше.

Тото цо ше ище рекламує и загваря, то и одредзени способ живота и привилеґиї хтори вон приноши… Американци то так здумано робели… Вони, наприклад, так рекламую америцки сон, представяю Америку як державу у хторей кажде може постац барз богати, а Америку люби велька векшина планети. У їх филмох мож у каждим трецим кадру видзиц америцку заставу як ше колїше на витре, фиґури америцких предсидательох, кока-колу, Бродвей, долар… Гунцути…

А интересантне же ше и обичаї преноша тадзи, до наших крайох. Даєдни наисце супер, и могли би лєгко зажиц. Ша, ниа, як нашо руски дзивки почали правиц дзивоцки вечари пред свадзбу. Хлапци правели од давна остатню, а тераз ше и дзивчата одшмелєли. А и мой ми кедиш гвари же штудирал да обновиме завити. Нормално же сом у глави такой вианализовала з вецей бокох цо го, божемой, нагнало на таке, бо нє паметам же то дахто од наших познатих зробел. А вец гвари же патрел у єдним – филму… Думам себе, но ша най, будзем ознова млода. А озда дацо и за придану достанєме… God bless America!

 

Tags: ,

Leave a Reply

Your email address will not be published. Required fields are marked *