ЦАРИЦА
Длуго наявйоване и чекане Националне швето Руснацох – прешло. Було крашнє, скоро вшадзи є означене… Даєдни ше старали чи ше им уда направиц програму, други чи будзе надосц публики, а треци дзе ше вообще и зиду. А я роздумовала лєм о тим – яка то жена була, тота царица Мария Терезия, цо нам ше дала населїц до тей дакедишнєй пустари…
Читаюци о нєй дознала сом вельо интересантни ствари. Окрем того же була груба, моцна, блядих очох и власох и красних ґамбох (гммм, цошка ми познате J), була барз схопна, одлучна, розумна, порихтана припознац свою гришку, алє була и ментално моцнєйша од своїх совитнїкох. Поведло би ше – мала велї прикмети єдного монарха. У хвильки кед нашлїдзела пристол, царица Мария Терезия нє знала нїч о тим як треба владац. Медзитим, дзекуюци своєй особеносци, удало ше єй змоцнїц Габзбурґску монархию. Своїх сотруднїкох сама виберала, велї мочари претворени до плодних жемох, викопани беґелї за наводньованє жеми, людзе почали жиц достоїнственше, людски права ше почало баржей почитовац. МТ остала запаметана и по тим же уведла обовязне школованє дзецох, принєсла закони у медицини котри и нєшка важа, а нє забудзме же слово о осемнастим вику!
Попри шицким тим, у двацецдзевец рочним малженстве зоз царом Францом I народзела шеснацецеро дзеци, од хторих тринацецеро прежили дзецинство! Дзеци громаду, брух вше по зуби, а монархия у войни.
Гваря же ше Мария Терезия старала о каждому свойому дзецку, хтори звичайно були владаре у других жемох, писала им голєм раз до тижня, алє була барз авторитативна.
Царицу цалком дотлукло кед єй умар супруг, цар Франц I, 18. авґуста на свадзби їх сина Леополда. Теди ше оштригала, престала ношиц прикраски, хижи обилєла на цмо и по конєц живота ше облєкала до чарного. Вецей ше нє указовала у явносци, престала ходзиц до театра, а каждого авґуста и каждого 18. дня у мешацу, шлїдуюци 15 роки по власну шмерц, заверала ше до своєй хижи.
Но, та, така була царица Мария Терезия. Поведли бизме, чувствительна жена у души, а права ґаздиня на високим пристолу. Та, ниа, одвит, кед же ше питаце прецо шицко тото пишем: нє знєважуюци МТ, алє потвердзуюци свойо становиско же шицки ми царици! Кажда на свой способ, кажда у своїм царстве, гоч нє у векшим як по сушедов плот и мосцик ґу калдерми…