ЖЕНОБЛОҐИЯ

КВАЧКА И ШТРАНҐ

Ясмина З ДРУГИМА У КОЛЄ

Док мой каждодньови живот нє подрозумйовал кабловску телевизию, а познєйше и интернет, шицко цо сом знала, цо сом дознала о швеце у котрим жиєм, подполно ше „уклапяло” єдно до другого. Леґо. И шицко було у якимшик стаємним розпорядку. Знало ше кеди ше емитує висти (на тих даскелїх програмох), кеди рисовани филми, и же ше кажду соботу вечар фамелийно патри филм. Познєйше, кед заблїсли телї програми кабловскей телевизиї пред моїма очми, нє могла сом ше одлучиц цо перше будзем патриц: чи програму на хторей ше емитує знїмки о прекрасней природи нашей планети, чи о животиньским швеце, чи о вареню, моди, чи историйни филми… Нє знаш цо вибрац. З часом сом префилтровала програми и кед сом видзела на хторих програмох ше найчастейше затримуєм – занємела сом. Прецо? Прето же то були програми лєбо емисиї зоз катастрофичну тему: ерупциї вулканох, трешеня жеми, цунамиї, траґични транспортни нєщесца, паданє авионох, нєзвичайни хороти и судьби, а шицко патрене зоз людского аспекту. Но, нє досц ми каждодньових бриґох и почежкосцох, а я ше будзем секирац зоз такима стварами? (гоч ґарантовано нє пойдзем до Америки, а окреме нє на восточне побрежє, бо там єст тельо ураґани же им уж даваю и власни мена, Штредня Америка потонє, бо ше пуща ляд на Сиверним полу и дзвига ше уровень води, а то ше исте случи и зоз Австралию, Жем виходзацого слунка зровна трешенє жени, а у Африки и так пуста пустара… Нє идзем я нїґдзе!Окреме нє на авиону!).

Лєм цо сом ше „одбила” од того цо сом так барз любела патриц, залапел ме интернет. И сто раз сом ше превипитовала чи то шицкому цо там пише треба вериц. Бо, ниа, кед ме дацо заболї, удуркам до ґуґлу и вон ми такой вируци дияґнозу. Нє мушим ходзиц до дохтора, заказовац препатрунок и чекац на шор. Сама сом себе и дохтор и апатикар. Правда, у тим множестве информацийох вше запаметам тоту найгоршу дияґнозу и тераз нє лєм же ме дацо болї, алє сом прешвечена же предо мну ище лєм дакельо мешаци живота, трапениє и мучениє. О других думкох най нє приповедам…

И нач ми вец кабловска и интернет? Же бим себе понаберала и живот жила у страху и поцерпаню?

Врацам ше назад на „телепередачу” на хторей сом патрела и цошка интересантне. У Колумбиї жию людзе хторих волаю балинероси. Вони жию у подножю гори през хтору водзи драга. Балинероси себе понаправяли кочики зоз колєсами и корманьом и напредок завязали моцни штранґ. Кед ше даяки камион пендра до брега, єден балинерос ускочи до кочика а други го привяже за камион. Так скоро кажди камион цага кочик до брега и вожи по верх балинеросох хтори там умиваю камиони и так зарабяю за живот.

Та вец сом себе подумала – нє хиба же то єст таки вшелїячини на телевизиї и интернету. Треба лєм винайсц чаривну формулу як ше одупрец тому. Треба же би ме дахто „заквачел за камион” и поцагнул на безпечнєйше место. Та, док назберам сили, годна сом ше ресетовац и предлужиц далєй. 😉

Tags: ,

Leave a Reply

Your email address will not be published.