ЖЕНОБЛОҐИЯ

ШАЛЄНА БИМ БУЛА КЕД БИМ ЦЕ ЛЮБЕЛА

Ясмина ШВЕТ У ХТОРИМ ЖИЄМ

Кед лєпше роздумам – вообще нє чежко буц шалєни. А нїч анї нє кошта. Єст и таких хтори ше правя же су шалєни, та себе так преправяю драгу у живоце… Алє кед любов у питаню (а вше ше коло того круци), вец нє знам чи ту єст места за дацо нормалне – хто люби тот и пошалї. А кедиш, на моїм другим Джибонийовим концерту, пациєнтох було кельо сцеш…

Гужва, квичанє, галайк зоз шицких бокох… Бина огроооомна, бас зоз звучнїкох биє до глави, алє мойо пайташки и я точно при бини. У першим шоре! Кед би кихнул та би му пошло далєй. Так зме блїзко були. Оглядам ше коло себе – шицки ми, жени чи дзивки, под адреналином. Тиж у першим шоре, алє дакус далєй, цали концерт престала баба у дзевятей децениї живота… Думам себе – но, ти ше го маш ище налюбиц, тота баба це шиє!

Гоч нє знам як то скорей було, алє барз ме корци чи правда же жени, наприклад на концертох Битлсох, руцали на нїх свойо споднї шмати, млєли и койцо ище. А корци ме як було на концертох Маринера лєбо Армитону? И вони були барз популарни у свой час. Чи и их счековали шалєни обожавательки?

После першого Джибонийового концерта на хторим сом була – жила сом од того ище дас тидзень. Як на инфузиї. Правда. Пошла сом з розума. Єден колеґа, руку на шерцо, гварел ми най ше крашнє спущим на жем. Же нє треба идеализовац познати особи. И вони звичайни людзе: „Думаш же тот твой шпивак нє пиє таблети од прициску?” Тоти слова ми барз чежко спадли. Розбил мою илузию! На фалатки…

А тераз, кед сом ше други раз припатрала на ньго як ше справує док преноши свою емоцию на публику (а то роби совершено), видзим же то нє так як ше мнє видзело. Тераз сом го видзела и з другого боку и видзим же Джибо анї нє таки совершени… Сиґурно бул колеґа у праву. Думам себе же можебуц и чамка, и барз ше каправи и бурави будзи, можебуц же му и стрика до уха лєбо крижох кед є таки узноєни вично на бини и на цуґу. И цо ци я знам яки є ище. Та вец – хто за ньго я? (могла бим ше тото опитац Санї Полдруги).

Випатра же ше будзем тримац жеми. Нє вредзи лєциц. А и нач кед ше илузиї з роками сами разбиваю, нє мушиме нїч анї зробиц. Пукню як цомпля. Лєм бим заш лєм ище сцела послухац Сашу Палєнкаша. А и Crazy cousins маю отримац концерт, чи нє?

Tags: ,

Leave a Reply

Your email address will not be published.