ЖЕНОБЛОҐИЯ

ГОДЗИНА

Ясмина ШВЕТ У ХТОРИМ ЖИЄМ

Нєдавно сом сконтала же о велїх стварох котри ме окружую барз мало знам. Нови Сад наисце познати по велїх историйних обєктох, будинкох у котрих бивали визначни людзе, архитектонских зданийох, та и велїх природних красотох. Знам же сом нє єдина, бо велї з нас обєкти у нашим околїску доживюю як же су ту виками, и же буду ту виками, и най буду, яка ме бриґа, жиєм свой живот…

Алє, кед дакус роздумам о шицким цо уложене до того (нє думам на пенєж, то придзе и пойдзе), алє на идею зоз котрей дацо настало – наисце сом импресионована.

Так ме аж и нашмеяла приповедка о познатей годзини на Петроварадинскей твердинї. Нє прето же ми цали тот проєкт шмишни, алє же як идея з 18. вику, котра теди мала кажде оправданє буц така яку ю и тераз видзиме, з нєшкайшого угла патреня – шмишна. Роби ше о тим же теди кед є поставена, коло 1750. року, як дарунок царици Мариї Терезиї Новому Саду. Мунтатови поставени так же би вельки указовал годзини, а мали минути. Так Новосадянє прейґ Дунаю, чим попатра на твердиню, видза кельо годзин. З часом тоту годзину почали волац и пияна годзина, прето же мунтатови вжиме дакус пожня, а влєце понагляю.

Можеце себе задумац таки часи? Кед попатрице на годзину, та вам важне лєм кельо годзин(и)? Нє патрице на минути, а дзе же ище секунди и стоти як цо ше нєшка шицко мера. У яким швеце жиєме кед шицко автоматски намесцене же би шицко робело точно до секунди, же би вершински спортисти доставали награди кед були лєпши за стотинки и милиметри…

Нє гварим, єст ту и одредзена нота правдивосци, привредней и економскей ефикасносци. Ша, озда зме за тоти два и пол вики напредовали. Алє, ми, людзе, як похопюєме час? Шицки гваря же ше ритем живота пошвидшал, и же шицким час лєци пред очми.

Можебуц то и так. А можебуц ище важнєйше опитац ше ЯК препровадзуєме тот час? Док сом була младша анї ми на конєц розума нє було. Нєшка уж иншак.

А як я препровадзуєм свой час? Нє тот на роботи, лєбо у порядних обовязкох, алє тоти пол годзини на дзень, котри кажде, алє кажде ма.

Я нє сцем пияна преходзиц през свой живот, подумам вше кед попатрим на твердиню. Сцем го жиц свидома каждей секунди хтору анї нє видно же дурка на тей годзини. Сцем вше знац кельо годзин.

Leave a Reply

Your email address will not be published.